Түркістан облысы, Сарыағаш ауданына қарасты Дербісек ауылындағы «ТП-32» су ұңғымасының айналасында туындаған өзекті мәселе бүгінде жергілікті билік пен құзырлы органдардың тұрақты бақылауына алынды. Аталған стратегиялық су нысаны бұған дейін ұзақ жылдар бойы «Рауан» жауапкершілігі шектеулі серіктестігінің теңгерімінде болып келген. Нақтырақ айтсақ, осы маңызды су көзін жеке кәсіпкер тиісті келісімшарт негізінде 27 жыл бойы үздіксіз пайдаланып келді. Алайда, аталған жер телімі мен нысанды жалға алу мерзімі ағымдағы жылдың 25 сәуірінде ресми түрде аяқталды.
Жалға алу мерзімі біткен соң, су ресурсын әрі қарай пайдалануға арнайы рұқсат беру мәселесі қаралған болатын. Құжаттарды зерделеу барысында «Арал-Сырдария» бассейндік инспекциясы тарапынан нысанда санитарлық қорғау аймағы талаптарының өрескел сақталмауы анықталып, заңды негізде кәсіпкердің су пайдалану құқығын мерзімінен ұзартудан үзілді-кесілді бас тартты. Бұл туралы арнайы өткен баспасөз брифингінде Сарыағаш ауданының әкімі Арман Абдуллаев ресми түрде мәлімдеді.
– Бүгінгі таңда 18 мыңға жуық жергілікті халқы бар Дербісек елді мекенін ауыз сумен қамтамасыз ету жағдайы толықтай тұрақты. Ауылдағы 3 мыңнан астам абонент орталықтандырылған таза су жүйесіне қосылған. Қазіргі уақытта халыққа су жеткізу және қызмет көрсету жұмыстарын «Сарыағаш Тұрмыс» коммуналдық мемлекеттік кәсіпорны өз жауапкершілігіне алып, жүзеге асыруда. Тұрғындарды сапалы ауыз сумен қамту процесі арнайы гидранттық жүйе арқылы, бекітілген штаттық режимде ақаусыз жүргізіліп отыр. Сонымен қатар, кенеттен су тапшылығы туындаған жағдайда алдын алу мақсатында «№2-ТП» ұңғымасы қосымша резервтік ресурс ретінде іске қосылды. Егер даулы болып отырған ұңғыма заң аясында мемлекет меншігіне толық қайтарылатын болса, тұрғындардың суға қолжетімділігі 100 пайыз сақталады. Сондай-ақ, «Рауан» ЖШС-на да өз қызметін заңды жалғастыру үшін қажетті су көлемі белгіленген тәртіппен тұрақты түрде бөлініп берілетін болады. Облыс әкімдігі бұл бағыттағы барлық шешімдер тек құқықтық шеңберде, заң аясында қабылданатынын және ешқандай тараптың құқығы бұзылмайтынын қатаң ескертті. Су ресурстарын пайдалану тәртібі тек сот шешімімен және уәкілетті органдардың ресми қорытындысына сәйкес реттеледі, – деді аудан басшысы Арман Абдуллаев.
Мәселенің заңдылық жағына тоқталған Түркістан облыстық Жер ресурстарын басқару департаменті басшысының міндетін атқарушы Алмас Досжановтың сөзінше, департамент тарапынан сотқа тиісті талап-арыз жолданған. Осы орайда, бұған дейін «Рауан» ЖШС-на берілген көлемі 0,15 гектар жер телімін жалға беру туралы қаулы мен шешімді мүлдем жарамсыз деп тану мәселесі көтерілді. Қазіргі таңда бұл іс сот өндірісіне алынып, қаралу үстінде.
Сонымен қатар, облыстық Санитариялық-эпидемиологиялық бақылау департаменті басшысының орынбасары Асқар Ысқақов та нысанда заң бұзушылықтардың барын рақтады. Оның мәлімдеуінше, жүргізілген тексеру жұмыстарының нәтижесінде «Рауан» ЖШС-на қарасты су ұңғымасының санитариялық қорғау аймағына қатысты ең басты құжаттардың бірі – жобалық құжаттаманың санитариялық-эпидемиологиялық оң қорытындысы мүлдем жоқ екендігі әшкереленген. Осыған байланысты, сот шешімімен аталған серіктестікке 98 300 теңге көлемінде әкімшілік айыппұл салынды.
Бұдан бөлек, Су ресурстарын пайдалануды реттеу және қорғау жөніндегі «Арал-Сырдария» бассейндік инспекциясының ресми мәліметінше, жергілікті Дербісек ауылының тұрғындары да бұл мәселеге бейжай қарамай, «Рауан» серіктестігіне қарасты су ұңғымасын мемлекет меншігіне қайтару туралы талап-тілектерін белсенді көтеруде. Инспекция мамандары жүргізген арнайы тексеріс барысында аталған кәсіпорын тарапынан ұңғымадан рұқсат етілген заңды су алу көлемінен (лимиттен) бірнеше есе асып кеткендігі және ең сорақысы – ұңғымадан ауылға тарайтын 2 негізгі су беру құбырында мемлекеттік есепке алу құрылғылары (су есептегіштер) мүлдем орнатылмағандығы анықталды. Осы табылған өрескел заң бұзушылықтар негізінде серіктестікке қатысты шұғыл әкімшілік іс қозғалып, 973 мың теңге көлемінде ірі көлемде айыппұл салынды. Қазіргі таңда ауылды сумен қамту мәселесі және сот процестері облыс басшылығының тікелей қадағалауында тұр.
