Түркістан облысы Кентау қаласында аймақтың экономикалық әлеуетін арттыруға бағытталған маңызды басқосу өтті. Түркістан облысы кәсіпкерлер палатасы Өңірлік кеңесінің ұйымдастыруымен Кентау қаласы мен Сауран ауданының кәсіпкерлерін жеке қабылдау шарасы ұйымдастырылды. Салмақты да сындарлы сипатта өткен бұл жиынға облыс әкімінің орынбасары Қанат Қайыпбек, Түркістан облысы кәсіпкерлер палатасы Өңірлік кеңесінің төрағасы Нұралы Әбішов, Өңірлік кеңес мүшелері, Кәсіпкерлер палатасының директоры Асылан Ибадуллаев, сондай-ақ облыстық басқармалар мен жауапты мемлекеттік органдардың бірінші басшылары арнайы қатысты. Мұндай кең құрамдағы кездесу аймақтағы іскерлік ортаның қордаланған мәселелерін тікелей және жедел шешуге мүмкіндік берді.
Жиында алғысөз алған облыс әкімінің орынбасары Қанат Қайыпбек мемлекет тарапынан отандық кәсіпкерлерді қолдау мен қорғау бағытында атқарылып жатқан ауқымды жұмыстарға тоқталып, бизнес өкілдерінен түскен әрбір ұсыныс пен арыз-шағым назардан тыс қалмайтынын баса айтты. Ол өз сөзінде Мемлекет басшысының кәсіпкерлікті дамыту, бизнеске қолайлы климат қалыптастыру және кәсіпкерлердің кедергілерін жедел арада шешу міндеттеріне ерекше назар аударып отырғанын тілге тиек етті. Осы орайда билік пен бизнес арасындағы ашық әрі сенімді диалогты нығайтудың маңызы зор екенін ескертті. Бүгінгі таңда облыс әкімдігі тарапынан жергілікті іскер азаматтарды демеу бағытында нақты бағдарламалар жүзеге асып жатыр. Соның ішінде қаржылай қолдау мақсатында кәсіпкерлер үшін небәрі 12,6 пайызбен тиімді несиелеуді көздейтін «Өрлеу» өңірлік бағдарламасы сәтті іске қосылған. Ағымдағы жылдың өзінде бұл бағдарлама арқылы 23 кәсіпкер жалпы құны 1,4 млрд теңгеге қаржыландырылып, өз бизнесін дөңгелетуге мүмкіндік алды. Сондай-ақ, осы жылы өңірде «Іскер аймақ» деп аталатын жаңа бағдарлама іске қосылып, қазіргі уақытта үміткерлерден өтінімдер қабылдануда. Әкімдік өндірістік ғимарат немесе зауыт-фабрика салуға ниетті кәсіпкерлерге барлық қажетті инфрақұрылымы тартылған, логистикалық тұрғыдан өте қолайлы жер телімдерін ұсынуға толық дайын екенін білдірді.
Ашық микрофон форматында өткен қабылдау барысында Кентау қаласы мен Сауран ауданынан келген кәсіпкерлер өздерін мазалап жүрген ең өзекті және түйткілді мәселелерді ортаға салды. Атап айтқанда, өндіріс орындарын сапалы әрі үздіксіз инфрақұрылыммен, яғни электр қуатымен, табиғи газбен және ағын сумен қамтамасыз ету мәселесі көтерілді. Бұдан бөлек, өнімді сыртқа шығару мен шикізат тасуды жеңілдететін теміржол логистикасын жүйелі дамыту, ауыл шаруашылығы мақсатындағы жерлердегі суару жүйелерін заман талабына сай жаңғырту мәселелері де назардан тыс қалмады. Сондай-ақ, отандық өндірушілерді қолдау мақсатында қазақстандық тауар өндірушілердің ресми тізіліміне ену рәсімдерін барынша жеңілдету мен оңтайландыру қажеттігі де ашық айтылды.
Түркістан облысы кәсіпкерлер палатасы Өңірлік кеңесінің төрағасы Нұралы Әбішов кәсіпкерлер көтерген әрбір мәселенің артында жұмыс орындары мен салық түсімдері тұрғанын, сондықтан оларды дер кезінде шешу бүкіл өңір экономикасының тұрақты әрі теңгерімді дамуы үшін аса маңызды екенін атап өтті. Кездесу барысында көтерілген әрбір нақты сауал бойынша жиынға қатысып отырған жауапты мемлекеттік органдар мен мекемелердің өкілдері дереу түсіндірме беріп, ұсыныстарды жүзеге асырудың құқықтық және практикалық нақты тетіктерін қарастырды. Кәсіпкерлердің барлық өтініштері мен ұсыныстары арнайы ресми хаттамаға енгізіліп, олардың алдағы уақытта сапалы орындалуы Өңірлік кеңестің тікелей және қатаң бақылауына алынды.
Жалпы, мұндай бетпе-бет кездесулер мен жеке қабылдаулар кәсіпкерлердің нақты проблемаларын орталыққа жеткізбей-ақ, жергілікті жерде шұғыл талқылап, оларды шешудің ең тиімді әрі оңтайлы жолдарын бірлесе айқындауға зор мүмкіндік береді. Түркістан облысында бизнес өкілдерімен осындай форматтағы кездесулер алдағы уақытта да тұрақты түрде өткізіліп, бизнес қауымдастықтың өңірді дамытуға бағытталған әрбір озық ұсынысы мен жасампаз бастамаларын мемлекеттік деңгейде қолдау жұмыстары үздіксіз жалғаса беретін болады.
Жеке қабылдаудан кейін Өңірлік кеңес мүшелері облыстың өндірістік әлеуетімен танысу мақсатында бірқатар кәсіпорынды аралады. Атап айтқанда, темір конструкцияларын өндіретін «Айдар Строй Групп» ЖШС және оптикалық кабель шығаратын «Kentau Cable Industries» ЖШС кәсіпорындарының жұмысымен танысып, өндіріс барысын бақылады.
Айта кетейік, Түркістан облысы – еліміздегі кәсіпкерлік субъектілер ең көп шоғырланған өңірлердің бірі. Өңірде 205 мыңнан аса шағын және орта кәсіпкерлік субъектісі жұмыс істейді.
Кәсіпкерлердің қаржысын және уақытын үнемдеу мақсатында облыстың барлық аудан және қалаларында шағын өндірістік парктер жобасы қолға алынған. Осы жоба аясында Сауран ауданында 8 ауылдық округте 130 өндірістік ғимарат құрылысы және Кентау қаласы аумағында 10 өндірістік ғимарат құрылысы іске асырылуда.
