Түркістан облысы әкімінің орынбасары Ертай Алтаев Біріккен Ұлттар Ұйымының (БҰҰ) даму құқығы мәселелері жөніндегі арнайы баяндамашысы Сурья Девамен ресми кездесу өткізді. Халықаралық деңгейдегі маңызды басқосу барысында өңір басшылығы Түркістан облысының соңғы жылдардағы қарқынды даму серпінін таныстырып, экономикалық өсім, инфрақұрылымды жаңғырту және әлеуметтік саланы ілгерілету бағытындағы жоғары көрсеткіштер мен жетістіктерге кеңінен тоқталды.
– Түркістан өңірі аймақтың әлеуметтік-экономикалық дамуын жүйелі қамтамасыз етуде Біріккен Ұлттар Ұйымы жариялаған жаһандық Тұрақты даму мақсаттарына (ТДМ) ерекше мән береді және оны стратегиялық жоспарлардың негізі ретінде қарастырады. Нақты статистикалық мәліметтерге сүйенсек, 2026 жылғы 1 наурыздағы жағдай бойынша Түркістан облысы халқының жалпы саны 2 миллион 146,7 мың адамды құрады. Оның ішінде қалалықтар үлесі – 545,1 мың адамға (25,4%) жетсе, ауыл тұрғындарының саны – 1 миллион 1601,6 мың адамды (74,6%) құрап отыр. Біз өңірді басқаруда тұрақты экономикалық өсім мен әлеуметтік әділеттілік қағидаттарын өзара үйлестіруге, халықтың тұрмыс деңгейі мен әл-ауқатын арттыруға және қоршаған ортаны қорғауға бағытталған кешенді әрі тиімді саясатты жүйелі жүргізіп келеміз, – деді Ертай Алтаев.
Айта кететін өте маңызды көрсеткіш, 2026 жылдың қаңтар-наурыз айларының қорытындысы бойынша Түркістан облысының қысқа мерзімді экономикалық өсімі 119,4%-ды құрап, бұл көрсеткіш бойынша республика көлемінде үздіктер қатарынан көрініп, екінші орынға ие болды.
Кездесу аясында аймақтағы экологиялық тұрақтылықты сақтау мәселелері де кеңінен талқыланды. Өңірде табиғи ресурстарды ұтымды және үнемді пайдалану, өндіріс пен тұрмысқа заманауи «жасыл» технологияларды енгізу және қоршаған ортаны қорғау шаралары кезең-кезеңімен, жүйелі түрде жүзеге асырылып келеді. Сонымен қатар, демографиялық ерекшеліктерге байланысты ішкі және сыртқы көші-қон, интеграция мәселелері де биліктің ерекше назарында тұр. Облыста әрбір азаматтың құқықтары мен заңды мүмкіндіктерінің теңдігін қамтамасыз етуге, қоғамдық тұрақтылық пен әлеуметтік үйлесімділікті барынша нығайтуға бағытталған ауқымды жұмыстар атқарылуда.
Жоғары деңгейдегі жиында қоғамдағы гендерлік теңдік пен әйелдердің рөлін арттыру мәселесі де арнайы сөз болды. Түркістан облысы – еліміздегі демографиялық өсімі мен туу көрсеткіші ең жоғары бірегей аймақ. Бүгінгі таңда өңірде 400 мыңнан астам берекелі отбасы түтін түтетіп отыр және республика бойынша көпбалалы батыр аналардың ең басым бөлігі дәл осы Түркістан облысында тұрады. Осы ретте, қыз-келіншектердің мемлекеттік басқару ісіне араласу белсенділігі де жоғары. Қазіргі уақытта облыстағы жалпы 5611 мемлекеттік қызметшінің 1572-сі немесе 28,1%-ы – әйелдер қауымы. Оның ішінде 233 әйел азаматша түрлі деңгейдегі маңызды басшылық лауазымдарды абыроймен атқарып отыр.
Сондай-ақ, өңірде әйелдер қауымы мемлекеттік қызметтен бөлек, шағын және орта бизнес саласында да жемісті еңбек етіп, аймақ экономикасына зор үлес қосуда. Мәселен, облыс көлемінде тіркелген шамамен 210 мыңнан астам жеке кәсіпкердің 91 мыңнан астамы – әйелдер. Ресми статистикалық деректерге сәйкес, өңірдегі шағын және орта кәсіпкерлік субъектілерінің 43,1%-ында әйелдер тікелей басшылық жасап, бизнесті дөңгелетіп отыр.
Кездесу барысында азаматтық қоғам институттарын қолдау, отбасылық құндылықтарды берік нығайту, ана мен баланы қорғау және әйелдердің қоғамдық-саяси процестердегі рөлін одан әрі арттыруға бағытталған маңызды бастамалар жан-жақты сөз болды.
Жиынды қорытындылай келе, Ертай Кенжебекұлы БҰҰ-ның арнайы баяндамашысы Сурья Деваның халықаралық үлкен тәжірибесі мен сараптамалық көзқарасының өңір дамуы үшін өте маңызды екенін атап өтті. Мұндай ашық пікір алмасулар Түркістан облысының алдағы даму стратегиясын халықаралық стандарттарға сай жетілдіруге және ең озық әлемдік тәжірибелерді өңірге тиімді енгізуге қуатты серпін беретінін жеткізді. Кездесу соңында қос тарап өзара екіжақты тығыз ынтымақтастықты нығайтуға және тұрақты даму бағытында тәжірибе алмасу шараларын үзіліссіз жалғастыруға ниетті екендіктерін білдірді.
