Түркістан облысында Мемлекет басшысы Қасым-Жомарт Тоқаевтың бұқаралық спортты дамыту, өңірлерде салауатты өмір салтын берік қалыптастыру және халықтың, әсіресе өскелең ұрпақтың спорттық инфрақұрылымға қолжетімділігін арттыру бойынша берген маңызды тапсырмалары бекітілген жоспарға сай, кезең-кезеңімен сәтті жүзеге асырылып келеді.
Осы жүйелі жұмыстардың заңды жалғасы ретінде, Сарыағаш ауданына қарасты Таскескен елді мекенінде жергілікті жастардың көптен күткен заманауи кіші футбол және «workout» (көше жаттығулары) алаңшасы ресми түрде пайдалануға берілді. Сәулеті келіскен жаңа әлеуметтік нысанның салтанатты ашылу рәсіміне Сарыағаш ауданының әкімі Арман Абдуллаев арнайы қатысып, жергілікті тұрғындарды ауыл өмірін жандандыратын жаңа орталықтың іске қосылуымен шын жүректен құттықтады. Сонымен қатар, айтулы іс-шараға аудандық мәслихат депутаттары, қоғам белсенділері, жергілікті тұрғындар мен ауыл ақсақалдары қатысты. Басқосуда сөз алған ауыл қариялары мен ата-аналар бұл игі бастаманың ауыл балалары үшін маңыздылығын ерекше атап өтіп, мемлекет тарапынан көрсетіліп жатқан қолдауға өздерінің шынайы ризашылықтарын білдірді.
Ауыл спортын серпінтуге арналған аталған спорт кешенінің құрылыс-монтаж жұмыстары толықтай аудандық бюджет қаражаты есебінен қаржыландырылып, мердігер ұйым «AIN Development» жауапкершілігі шектеулі серіктестігі тарапынан жоғары сапамен жүзеге асырылды. Жаңа нысан жасанды көгал төселген кіші футбол алаңымен ғана шектелмей, мұнда ашық аспан астында шынығуға арналған заманауи «workout» құрылғыларымен және қауіпсіздік талаптарына сай арнайы спорттық жабындармен толық жабдықталған.
Айта кетейік, пайдалануға берілген жаңа спорттық алаңша Таскескен елді мекені тұрғындарының, соның ішінде мектеп оқушылары мен жасөспірімдердің бос уақытын тиімді әрі пайдалы өткізуіне, дене шынықтырумен тұрақты айналысуына және ауыл ішілік түрлі спорттық турнирлер мен мәдени іс-шараларды жоғары деңгейде ұйымдастыруға кең мүмкіндік береді. Сарыағаш ауданы әкімдігі тарапынан ауылдық аймақтарды көркейту және спорттық нысандар желісін дамыту жұмыстары алдағы уақытта да өз жалғасын табады.
