Түркістан облысында азаматтардың арыз-шағымдары мен өтініштеріне дер кезінде құлақ түру және жергілікті халықпен тікелей байланыс орнату жұмыстары жүйелі түрде жалғасып келеді. Осы бағыттағы кезекті шара ретінде Түркістан облысы әкімінің орынбасары Қанат Қайыпбек өңір тұрғындарын жеке мәселелері бойынша қабылдап, азаматтардың көкейінде жүрген өзекті сауалдары мен ұсыныс-пікірлерін мұқият тыңдады. Жеке қабылдауға келген облыс тұрғындары негізінен әлеуметтік маңызы жоғары мәселелерді, оның ішінде жер телімдерін заңдастыру, жер учаскелерінің нысаналы мақсатын заң шеңберінде өзгерту және өзге өңірлік түйткілдерді ортаға салды.
Тұрғындардың арыз-шағымдарын жеке-жеке зерделеген Қанат Қайыпбек азаматтардың әрбір өтініші аймақ басшылығының назарынан тыс қалмайтынын және бақылауда болатынын ерекше жеткізді. Ол халықтың әлеуметтік тұрмысы мен жер қатынастарына қатысты туындаған мәселелерді созбалаңға салмай, дер кезінде әрі тек қолданыстағы заңнама аясында ғана әділ шешу қажеттігін баса айтты. Осыған орай, облыс әкімінің орынбасары жиынға қатысып отырған жауапты басқармалар мен тиісті бөлім басшыларына көтерілген мәселелерді жан-жақты зерттеп, әрбір жағдай бойынша заң талаптарына сай нақты шешім қабылдауды қатаң міндеттеді.
Мұнымен қоса, өңірдегі мемлекеттік органдардың ашықтығын қамтамасыз ету мақсатында азаматтарға уақтылы және сапалы кері байланыс орнату тапсырылды. Құзырлы мекемелерге тұрғындар арасында заңнамалық талаптар бойынша түсіндіру жұмыстарын барынша күшейту қажеттігі ескертілді. Бұл қадамдар жергілікті тұрғындардың мемлекеттік басқару институттарына деген сенімін арттырып, туындаған түйткілдердің құқықтық алаңда тез әрі тиімді шешілуіне септігін тигізбек.
Айта кетейік, Түркістан облысының әкімі мен оның орынбасарлары тұрғындармен кері байланысты нығайту мақсатында бекітілген арнайы кестеге сәйкес жеке қабылдау жұмыстарын тұрақты және үздіксіз түрде жүргізіп келеді. Бүгінде мемлекет пен халық арасындағы алтын көпірге айналған бұл қабылдауларға азаматтар «eOtinish» бірыңғай мемлекеттік ақпараттық базасы арқылы электронды түрде немесе облыс орталығында арнайы ашылған Азаматтарды қабылдау орталығына тікелей келіп, өз өтініштерін қалдыру арқылы алдын ала жазыла алады.
