Түркістан облысында қоғамдық-саяси ахуалды тұрақтандыру, өңірдегі өзекті мәселелерге дер кезінде назар аудару және кез келген келеңсіз жайттардың алдын алу шаралары – аймақ басшылығының қашанда басты назарында тұратын стратегиялық бағыттардың бірі. Осыған орай, бүгін Түркістан облысы әкімінің орынбасары Ертай Алтаевтың төрағалығымен құзырлы органдар мен басқарма басшыларының қатысуымен кезекті маңызды апталық штаб отырысы өтті.
Жиынға Түркістан облысы прокурорының орынбасары Дәулет Тлемисов, Түркістан облысы Полиция департаменті бастығының бірінші орынбасары Арман Тіленшин, облыстық білім басқармасының басшысы Ғалымжан Орынов, сондай-ақ полиция департаментінің қоғамдық қауіпсіздік басқармасы басшысының міндетін атқарушы Алихан Алентаев, Әкімшілік полиция басқармасы бастығының міндетін атқарушы Ерлан Асқаров және облыстық Дін істері басқармасының басшысының міндетін атқарушы Қайрат Абуов арнайы қатысып, күн тәртібіндегі мәселелер бойынша баяндама жасады.
Ауқымды штаб отырысында ең алдымен «Ақпараттық-талдау орталығы» КММ ресурстары арқылы бұқаралық ақпарат құралдары мен әлеуметтік желілерге жүргізілетін күнделікті мониторинг жұмыстары және соның негізінде туындаған мәселелер бойынша жедел шешім қабылдау алгоритмінің жаңа жобасы егжей-тегжейлі қаралды. Мұнымен қоса, мамыр айының аяғында мектеп бітіруші түлектердің қатысуымен өтетін ауқымды іс-шаралар кезіндегі қоғамдық қауіпсіздік пен құқықтық тәртіпті барынша күшейту мәселелері қызу талқыланып, алдағы уақытта атап өтілетін қасиетті Құрбан айт мерекесіне дайындық жұмыстары да сөз болды.
Жиын барысында биыл облыс аумағындағы барлық білім ошақтарында мектеп бітіру кештерін, салтанатты банкеттерді және жастар арасындағы қауіпті автокортеждер мен көлік шерулерін ұйымдастыруға мүлдем жол берілмейтіні ерекше атап өтілді. Сондай-ақ оқушылардың қауіпсіздігін қамтамасыз ету мақсатында мейрамханаларда, дәмханаларда, қала сыртындағы демалыс аймақтарында және табиғат аясында мектеп бітіруге қатысты кез келген форматтағы ойын-сауық іс-шараларын өткізуге ремий түрде қатаң тыйым салынады. Мектеп бітіруші түлектерге аттестаттар мен дипломдар тапсырудың ресми салтанатты рәсімдері ешқандай ысырапшылықсыз, тек білім беру ұйымдарының өз қабырғасында ғана белгіленген тәртіппен ұйымдастырылуы тиіс.
Осыған байланысты, облыс әкімінің орынбасары Ертай Алтаев ағымдағы жылдың 25 мамыры күні оқушылар мен жасөспірімдер тарапынан орын алуы мүмкін автокортеждерді, қауіпті көлік шерулерін және өзге де рұқсат етілмеген заңсыз іс-шараларды болдырмау және олардың алдын алу үшін тәртіп сақшылары тарапынан рейдтік, түсіндіру және патрульдік бақылау шараларын барынша күшейтуді тікелей тапсырды. Сонымен қатар бітіру іс-шаралары өтетін білім беру ұйымдарының маңындағы қоғамдық тәртіпті сақтауды, балалар мен тұрғындар жазғы маусымда көп шоғырланатын саябақтарда, су айдындары мен демалыс орындарында қауіпсіздік рейдтері мен құзырлы органдардың кезекшіліктерін арттыруды жүктеді.
Жиында барлық жауапты басқарма өкілдері мен құзырлы орган басшыларына бекітілген алгоритмге сәйкес бірлесе жұмыс жүргізу, аймақтағы қоғамдық-саяси ахуалды тұрақты бақылауда ұстап, құқық бұзушылықтарға қатысты тиісті шараларды заң шеңберінде қабылдау тапсырылды.
Айта кететін болсақ, қазіргі таңда демографиялық өсімі жоғары Түркістан облысындағы жалпы саны 1106 ортаெ мектепте 554 776 оқушы білім алып жатыр. Оның ішінде 940 мемлекеттік мектепте – 499 780 оқушы тәрбиеленсе, соңғы жылдары саны артып келе жатқан 166 жекеменшік мектепте – 54 996 оқушы дәріс алуда. Биылғы оқу жылының қорытындысы бойынша аймақтағы 9-сыныпты – 47 174 оқушы, ал үлкен өмірге қадам басқалы тұрған 11-сыныпты – 35 294 жас түлек аяқтағалы отыр.
Қазіргі уақытта жоғары оқу орындарына түсуге ниетті Ұлттық бірыңғай тестілеуге (ҰБТ) қатысу үшін 30 682 түлек ресми түрде өтініш берген, бұл көрсеткіш биылғы 11-сынып бітірушілердің жалпы санының 87 пайызын құрап отыр. Мемлекеттік органдар мен полиция департаментінің бірлескен үйлесімді жұмысы осы мыңдаған жас жеткіншектің қауіпсіздігі мен аймақтағы тұрақтылықты қамтамасыз етуге бағытталған.
