Ел экономикасының тұрақты дамуы мен ауыл тұрғындарының тұрмыс сапасын арттыруда шағын және орта кәсіпкерліктің атқаратын ролі орасан зор. Мемлекет басшысы Қасым-Жомарт Тоқаев өз Жолдауларында ауылдық жерлерде жеке кәсіпкерлікті кеңінен қолдау, отбасылық бизнесті жандандыру және ұлттық өндірісті өркендету қажеттігін үнемі баса айтып келеді. Президенттің бұл бағыттағы тапсырмаларын жүзеге асыруда «Ауыл аманаты» мемлекеттік бағдарламасы нақты серпін беріп, өңірлердегі іскер де еңбекқор азаматтардың өз кәсібін ашуына кең жол ашуда.
Жылдық мөлшерлемесі небәрі 2,5 пайызды құрайтын жеңілдетілген микрокредиттер ауыл тұрғындарының өз ісін өрге домалатуына зор мүмкіндік беруде. Бұл жоба Түркістан облысының тарихи-мәдени орталығы саналатын қасиетті Отырар ауданында да жоғары деңгейде іске асуда. Ауданда тек ауыл шаруашылығы мен мал өсіру ғана емес, сонымен қатар ұлттық қолөнер мен тұрмыстық бұйымдар өндірісін дамытуға ниетті кәсіпкерлердің қатары көбейіп келеді.
Осының жарқын бір мысалы – Отырар ауданы, Қарғалы ауылдық округіне қарасты Отырар ауылында тұратын жеке кәсіпкер «Қалдарбеков». Шаруашылықтың тізгінін ұстаған Калдарбеков Ерлан Анарбайұлы мемлекет ұсынған тиімді мүмкіндікті мүлт жібермей, «Ауыл аманаты» бағдарламасына белсене қатысты. Нәтижесінде ол өзінің кәсіпкерлік жобасын сәтті қорғап шығып, 8 000 000 теңге көлемінде жеңілдетілген несие қаражатына қол жеткізді.
Ерлан Анарбайұлы бөлінген қаржыны ұлттық өнер мен шеберлікті ұштастырған төл кәсібін кеңейтуге бағыттады. Несие қаражаты есебінен қолөнер бұйымдарын дайындауға қажетті заманауи құрал-жабдықтар мен арнайы станоктар сатып алынды. Бұл техникалық жаңартулар өндіріс процесін жеделдетіп, шығарылатын бұйымдардың сапасы мен әсемдігін жаңа деңгейге көтеруге мүмкіндік берді.
Бүгінгі таңда шеберханадан шығатын ұлттық нақыштағы қолөнер бұйымдары жоғары шеберлікпен дайындалып, тұтынушылар тарапынан үлкен сұранысқа ие болып отыр. Тарихы терең Отырар өңірінде ұлттық қолөнерді қайта жаңғыртып, оны табысты бизнеске айналдыру – бабалар аманатына адалдық пен заманауи кәсіпкерліктің жарасымды үлгісі. Мұндай өндіріс түрі ішкі нарықты отандық сапалы бұйымдармен қамтамасыз етіп қана қоймай, ауданның туристік әлеуетін арттыруға да өзіндік үлесін қосуда.
Жеке кәсіпкер Ерлан Калдарбековтың сәтті кейсі – «Ауыл аманаты» жобасының ауыл халқына берген нақты мүмкіндігінің тағы бір айқын дәлелі. Мемлекет тарапынан көрсетілген қаржылай қолдаудың арқасында қарапайым ауыл азаматы өз ісін ашып, отбасылық табысын еселеп, ауыл экономикасының дамуына өзіндік үлесін қосып отыр.
Отырар ауданында «Ауыл аманаты» жобасы аясында осындай бастамашыл азаматтарды қолдау жұмыстары жүйелі түрде жалғаса береді. Мемлекеттік бағдарламаларды тиімді пайдаланған отырарлық кәсіпкерлердің ісі алға басып, өңірдің әлеуметтік-экономикалық әлеуетін арттыра түсері сөзсіз.
