Маусым айының төртінші жұлдызында атап өтілетін Қазақстан Республикасының Мемлекеттік рәміздері күні — елдік пен егемендіктің, бірлік пен тұтастықтың басты құндылықтарын ұлықтайтын айтулы мереке. Осы маңызды датаға орай, Түркістан қаласындағы заманауи «Фараб» әмбебап ғылыми кітапханасында дәстүрлі өңірлік патриоттар форумы жоғары деңгейде ұйымдастырылды. Елдік рухты асқақтатқан бұл алқалы жиынға Түркістан облысы әкімінің орынбасары Ертай Алтаев, облыстық мәслихат депутаттары, зиялы қауым, түрлі саланың ардагерлері мен озық қызметкерлері, сондай-ақ белсенді жастар қатысты. Салтанатты іс-шараның шымылдығы Қазақстан Республикасының Мемлекеттік Әнұранын жиналған қауымның бір кісідей тік тұрып, асқақ үнмен орындауымен ашылды. Бұл сәт залдағы әрбір азаматтың бойындағы отансүйгіштік сезім мен ұлттық мақтанышты еселей түскені анық.
Мерекелік жиында алғашқы болып сөз алған Түркістан облысы әкімінің орынбасары Ертай Алтаев сөз сөйлеп, өңір халқын Мемлекеттік рәміздер күнімен шын жүректен құттықтады. Ол өз сөзінде Түркістан облысында мемлекеттік нышандарды қадірлеу, насихаттау және өскелең ұрпаққа патриоттық тәрбие беру бағытындағы жұмыстардың жүйелі түрде жүргізіліп жатқанына тоқталды. Осы мереке қарсаңында жылдағы әдемі дәстүрге сай өтіп жатқан Патриоттар форумы ел дамуына өзіндік үлес қосып, күнделікті тіршілікте ерлік пен еңбектің үлгісін көрсетіп жүрген азаматтарды ұлықтайтын ерекше іс-шара екенін атап өтті. Форум аясында қоғамның сан салаларында жоғары жетістіктерге қол жеткізген майталмандардың марапатталатынын айтқан ол, азаматтардың қажырлы еңбегі өңірдің дамуына серпін беріп, еліміздің өркендеуіне қызмет етіп жатқанын тілге тиек етті. Сонымен қатар, қазіргі таңда Түркістан облысында мемлекеттік рәміздерді кеңінен насихаттау мен жастардың патриоттық тәрбиесін күшейту бағытында ауқымды жұмыстар қолға алынғанын, биыл Ордабасы, Мақтаарал және Сауран аудандарында жаңа Рәміздер алаңдарының пайдалануға берілуі соның айқын дәлелі екенін мәлімдеді. Бұл жаңа нысандар тұрғындардың, әсіресе жастардың бойында елдік рух пен отансүйгіштік қасиеттерді нығайтуға қызмет етеді. Сондай-ақ, шара барысында облыстық мәслихат төрағасы Нұралы Әбішов те мінберге көтеріліп, жиналғандарға өзінің ізгі niеті мен құттықтауын жеткізді. Ол халық қалаулылары атынан аймақтың әлеуметтік-экономикалық өсіміне үлес қосып, қоғамдық тұрақтылықты сақтауға атсалысып жатқан барша азаматтарға алғыс айтты.
Форумның ең негізгі әрі толқынысты сәті — «Еңбек адамы» тұжырымдамасы аясында өткен салтанатты марапаттау рәсімі болды. Мұнда сахна төріне күнделікті өмірде ерен еңбегімен көзге түсіп, өз міндетін мінсіз атқарып жүрген нағыз маман иелері шақырылды. Өз саласында жоғары жетістіктерге жетіп, қоғамдық өмірге белсенді араласып жүрген бірқатар еңбек адамы арнайы марапаттарға ие болды. Олардың қатарында адам жанын арашалауда түн ұйқысын төрт бөлген білікті дәрігерлер мен жедел жәрдем бекетінің жауапты жүргізушілері, сан ұрпақты білім нәрімен сусындатқан ардақты ұстаздар мен өңірдің руханиятын байытып, мәдени мұраны дәріптеп жүрген мәдениет қызметкерлері бар. Сонымен бірге, Түркістанның жаңа тарихи келбетін қалыптастыруға атсалысып жатқан құрылысшылар мен аймақ экономикасына серпін берген отандық кәсіпкерлер, тілсіз жаумен күрескен қайсар өрт сөндірушілер, қоғамдық тәртіпті түн демей, күн демей күзеткен патрульдік полиция батальонының қызметкерлері және көк байрағымызды халықаралық аренада желбіреткен дарынды спортшылар да марапат төрінен көрінді. Марапатталған азаматтар өз кезегінде еңбектерінің еленіп, осындай жоғары деңгейде құрмет көрсетілгеніне ризашылықтарын білдірді. Салтанатты жиынның соңы отаншылдық рухты асқақтатып, жүректерге жылылық ұялататын, ел мен жерді жырлайтын белгілі өнерпаздардың қатысуымен өткен концерттік бағдарламаға ұласты. Бұл форум Түркістан жұртшылығы, әсіресе өскелең ұрпақ үшін нағыз патриотизм мен адал еңбектің үлгісін көрсеткен ерекше шара ретінде есте қалды.
