Түркістан облысының әкімі Нұралхан Көшеровтің төрағалығымен өткен кезекті аппараттық мәжілісте өңірлік жұмыспен қамту картасының орындалу барысы мен халықтың әлеуметтік әл-ауқатын арттыру мәселелері жан-жақты қаралды. Жиын барысында аймақ басшысы жауапты басқармалар мен барлық аудан, қала әкімдеріне жұмыспен қамту көрсеткіштерін тек қағаз жүзінде емес, сапалы әрі нәтижелі орындауды шегелеп тапсырды. Нұралхан Оралбайұлы инвестициялық және инфрақұрылымдық жобаларды белгіленген мерзімде іске асыру арқылы тұрғындар үшін тұрақты әрі нәтижелі жұмыс орындарын көбейтудің стратегиялық маңызына тоқталды. Өңір басшысы өз сөзінде 2026 жылға жұмыспен қамту бойынша белгіленген индикаторларды уақтылы әрі сапалы орындауды, қосымша инвестиция тарту арқылы жаңа тұрақты жұмыс орындарын ашуды басты міндет ретінде жүктеді. Жұмыссыздық деңгейін төмендету бағытында шұғыл және тиісті шаралар қабылдау қажеттігін айтқан облыс әкімі бұл салада әлі де болса бірқатар кемшіліктер бар екенін ашық сынға алып, жергілікті атқарушы органдардың жұмысын барынша ширату қажеттігін мәлімдеді.
Алқалы мәжіліс аясында Облыстық жұмыспен қамтуды үйлестіру және әлеуметтік бағдарламалар басқармасының басшысы Мекенхан Қозыханұлының атқарылған жұмыстар мен алдағы жоспарлар туралы егжей-тегжейлі есебі тыңдалды. Оның мәлімдеуінше, биыл Түркістан облысында аймақ басшысы бекіткен Өңірлік жұмыспен қамту картасы шеңберінде жалпы саны 74516 жаңа жұмыс орнын ашу көзделген. Бұл ауқымды меженің ішінде 54483-і тұрақты еңбек көзі болса, 20033-і уақытша жұмыс орны ретінде қарастырылып отыр. Мәжілісте айтылған 2026 жылғы 1 маусымдағы ресми жағдай бойынша, өңірде қазірдің өзінде 35539 жұмыс орны нақты ашылып үлгерді. Статистикалық мәліметтерге сүйенсек, оның 19100-і тұрақты бағытта болса, 16439-ы уақытша жұмыс орындарының үлесіне тиесілі. Бүгінгі таңда тұрақты жұмыс орындарына 14507 азамат арнайы жолдамамен орналасса, мемлекет тарапынан субсидияланатын жұмыс орындарына 16027 адам тартылып, екі қолға бір күрек тапқан.
Мемлекеттік деңгейдегі ұлттық жобалар мен стратегиялық тұжырымдамалар аясында биыл облыс аумағында 284 инфрақұрылымдық жобаны іске асыру жоспарланған, бұл өз кезегінде 2465 жаңа жұмыс орнын ашуға мүмкіндік береді. Қазіргі таңда бұл бағыттағы жұмыстар қарқынды жүріп, 105 маңызды жоба толықтай жүзеге асырылды және соның нәтижесінде 935 жаңа жұмыс орны құрылды. Сондай-ақ, Мемлекет басшысының тікелей тапсырмасымен қолға алынған «10 мың тұрғынға 100 жаңа жұмыс орны» бастамасы шеңберінде Түркістан өңірінде 4 070 жұмыс орны ашылып, халықтың еңбек белсенділігін арттыруға елеулі септігін тигізді. Жұмыспен қамтудың белсенді шаралары аясында жыл басынан бері 16 мыңнан астам азамат мемлекет тарапынан субсидияланатын арнайы жұмыс орындарына бағытталды. Олардың қатарында жас мамандардың тәжірибе жинақтауына септігін тигізетін «Жастар практикасы», әлеуметтік жұмыс орындары, қоғамдық жұмыстар және аға буын өкілдерін қолдауға арналған «Күміс жас» жобалары бар.
Мәжілісте жұмыспен қамту мәселесімен қатар, аймақтағы әлеуметтік қолдау шараларының орындалу барысы да терең сараланды. Биыл облыс бойынша жалпы алғанда 59 мыңнан астам адамды атаулы әлеуметтік көмекпен (АӘК) қамту көзделсе, 1 маусымдағы ресми көрсеткіштерге сәйкес 42771 адамға, яғни 6875 отбасына тиісті әлеуметтік көмек тағайындалып, дер кезінде төлене бастады. Нәтижелі жұмыстардың арқасында бүгінде өңірдегі кедейлік деңгейі 2 пайызды құрап, жоспарлы көрсеткіштің тиісті деңгейде орындалуы толық қамтамасыз етілді. Сонымен қатар, ауылдық аймақтарды дамытудың негізгі тетігіне айналған «Ауыл аманаты» жобасын іске асыру мәселесі де басты назарға алынды. Президенттің стратегиялық тапсырмасына сәйкес, 2026-2029 жылдар аралығында бұл ауқымды жобаға 217 мыңнан астам ауыл тұрғынын тарту көзделіп отыр. Осы мақсатта биыл республикалық бюджеттен 15,3 млрд теңге көлемінде қомақты қаржы тартылып, ауыл шаруашылығы мен кәсіпкерлік бағытындағы 1115 жобаны тікелей қаржыландыру және соның есебінен 1400 жаңа тұрақты жұмыс орнын ашу жоспарланған.
Алқалы мәжілісті қорытындылаған өңір басшысы өз жұмысында салғырттық танытып, белгіленген индикаторларға жете алмаған бірқатар аудан, қала әкімдері мен басқарма басшыларының қызметіне қатысты қатаң сын-ескертпелер айтты. Нұралхан Көшеров жыл соңына дейін бекітілген межелерді орындамаған және жұмысты тиісті деңгейде ұйымдастырмаған басшылардың дербес тәртіптік жауапкершілігі қатаң қаралатынын қадап ескертті. Облыс әкімі алдағы уақытта жұмыспен қамту бағытындағы барлық жоспарлардың мүлтіксіз орындалуын, әсіресе тәуекел аймақтарындағы көрсеткіштерді шұғыл жақсартуды және мемлекеттік әлеуметтік бағдарламалардың халық үшін тиімділігі мен қайтарымын барынша арттыруды нақты міндеттеді.
